اعنبو بليسك وش هالبجاحه! جايبن لي قوارير تقول لي كيسان بلاستيك خخخخ

الله يعافيهم حقين الجمارك بمنفذ البطحاء يومهم يقفطون تريلة مليااانة من شراب المخزي (ويسكي) جايتن من حدى الجيران (وش منفذه البطحاء يومهم مايقولون اسم الدولة :D؟) على انهن كيسان بلاستيك حسب كلام الاوراق اللي بالتريلة. وقال ضيف الله العتيبي مدير جمارك البطحاء اننا عقب ماعرضنا التريلة على الجهاز حق الاشعة عشان نشوف كان فيه خاش خرباش ويوم نبشنا شوي مادرينا الا بوسط هالكراتين اللي يقال لهن كراتين كيسان طلعن قوارير خمر، واننا ضفيناهن ونبي نكبهن باقرب برحه.أما راعي التريلة اللي من جنسية عربية فغيبوا شمسه عند الجهات المختصّة.وقال مدير الجمارك ان العيال بهالجمارك موب يقصرون الله يعافيهم يومهم يقفطون اشياء كثيرة من الممنوعات بفضل الله ثم بفضل الاجهزة الزينه والجديده من الكشف الاشعاعي ولا يهون مدير عام الجمارك بالمملكة.الله يعطيهم الصحه والعافيه ويقويهم..