علمن ياصلكم كلكم.. شغلي مانيب معدله ولانيب لاين


هذا الله يسلمكم باراك اوباما المرشح الديموقراطي أزبد للعالم بامريكا أمس انه ماطرى له طاري يعدل خططه علشان حرب العراب وانه يبي ينهي هالبزوطه والحواق اللي سواها بوش قبله وعاثوا بالعراق فساد،

ولا قال هالكلام الا عقب ماطاح حتسي من لسانه قال بالحرف الواحد "شكلي ابصقل سياستي عشان العراق" لكنه ازبد للصحفيين اللي يمسكون طرف كلمه ويبهرون بالخبر لين يغدي نصبه كبر قريح، لأن الصحفيين هناك عصبوا وقفلت معهم لأنهم يبونه يوقف هالخمبقه اللي مسمينها حرب وثاروا عليه.. لكنه قال وهو راكب طيارته ومنزل القزازه عشان يكلم الصحفيين "والله يا ماتوقعت ان هرجي تبون تعيدون وتزيدون عليه انتم وخششكم، انا مانيب تارككم لكني مستغرب من فهمكم لكلامي كلن حسب هواه"

وقال اوباما والله يا اني خريت الزيت بعد وقلت بس رحنا فيها عقب ما شفت هالجرايد والصحافه شابينن علي وقلت بس راحت علي الرئاسه.. لكن الوكاد ان هالحرب ابوقفها يعني ابوقفها بحول اللي ماتنام عينه.

وهو الحين جهاد مع المرشحين كونه اول امريكي خال يترشح لهالمنصب، لكن هزه تصريحه الاخير واللي اعتبروه الصحافه انه لان شوي عن قراراته وصار يرقل، لكنه زبد لهم وقال لاا انا رجالن عند كلمتي واوريكم لكن نبي نشوف القياده العسكريه وش يسوون،

طيب يا اوباما وشلون تبي تسحب هالجنود اللي كنهم ذر من امريكا؟ قال اني ناوي اسحب كل شهر كتيبه كتيبتين لين يسهل الله وعقب 16 شهر ان قاله الله نبي نسحب كل المحاربين المجدعين هناك.