والله مانتب كفو من يروح ويجي على طياراتكم


هذا سلمكم الله قبل فترة كانت شركة الطيران البريطانية BMI أعلنت قبل فترة انهم محددين قيمة التذكره من الرياض الى لندن قيمتها كذا زائد ضرائب، جيزها جيز اي شركة طيران، ومن هالضرائب ضريبه اسمها "ضريبة 11 سبتمبر" وحاسبينها بـ 1610 ريال، وانها خاصتن للسعوديين اللي يبون يروحون عن طريقها سواء لبريطانيا او غيرها.. ولا خلوهم ربعنا ثاروا عليهم وقالوا وش هالشغل يا والله الحقره يعني انت يالسعودي متهمينك وقاضين انك متسبب بمشكلة هالبرجين اللي صاجيننا فيها اللي يشوفهن الحين يقول برج الماء اللي بالمربع ..!
المهم وهالحين هالشركة "انتي يا BMI" يعتذرون ويقولون والله مادرينا عن هالخلل واننا كلنا بشر وكلنا نخطي (وش هالخطأ اللي ماطلع الا من مطار الملك خالد عساك العمى اللي يعميك انت وياه) ويقولون ابشروا والله بالحق واللي مايلحق وان هالخلل عدلناه وقشعنا الضريبة.
المهم جاك طحطوح من طحاطيحهم يقال له "روبرت ليكلي" وهو الراس الكبير لهالشركة، كزّ رسالة كول مي للمهندس عبد الله رحيمي، رئيس هيئة الطيران المدني عندنا، يتأسف ويتعذّر ويقول اننا اخطينا ومنّا العذر ومنكم السموحه ومايرد الكريم الا اللئيم ومن هالكلام.
وجلس يصرّف انت يا روبرت يقول اصلاً هالضريبة طالبتها امريكا على اللي يحجزون ويقصقصون التذاكر عن طريق النت بس مالها علاقه بسوقكم انتم يالسعوديين، لكن ماندري وش اللي صار بدال ماتطلع على الموقع الامريكي بلحاله طلعت بكل المواقع (والله يا ان الشق اكبر من الرقعة اقول) ..ويوم خلص محلّف ومقسم انه صادق ومن هالكلام قال اصلاً حنا نبي نقوي شغلنا مع السعوديه ونبي نقوي اقتصاد شركتنا مثل مانبي نقوي علاقتنا بين الشعبين السعودي والبريطاني.(اقول يابو رحيمي.. ازبد له وقل فنجالك موب مشروب لين تجيب اعتذار زي الاوادم، وقل له وش هالحتسي حتى تصريف ماتعرف تصرف وانت مدير شركة!)