موكب الدبابات الروسيه شاقين الشعيب يبون يحوسون جورجيا


هذا الله يسلمكم ابو دبليو ولد البواشا (على وزن السماثا) ماغيره ريس امريكا، مسك شنبه وقال اني ابكلم الزكرت عندي واقول لهم يكزون (يرسلون) كم طيارة نقل عسكرية وزكرت البحرية عشان نعاون ونفرع لجورجيا هالمساكين اللي متلاقطين مع روسيا، وقال بوش يومه يتشاوف مع هالصحافيين: والله اني خايف(ن) من كلام(ن) واصل(ن) لي ان هالروس مهوب قاضبين ارضهم ويبون يبتلون يحارشون هالمساكين الجورجيين، وانه انتي يا روسيا تبين تطيحين من عيون الناس عقب شغلكم ذا.
لكن واحدن من اللي مخربينها من قصر الكريملين (مجلس الوزراء فرع روسيا) وهو واحدن كازه وزير الخارجيه يوم سمع هرج بوش وانه بدا يهايط، قال شوف ياحبيبي بوش.. ياحنا يا جورجيا تخير بيننا..
وقال مرسولنا هناك (يحتفظ الاقلاع باسمه) ان مجلس الكرملين ماقال هالحتسي الا عقب ماحامت تسبودهم من كثرة قرق بوش، وقال ان اعلى ما بخيل ابوه يركبه راعي البقر ذا ولا علينا منه لأنه يخسى يسوي شي.
وعلى طاري بوش، يقول اني ماسويت هالسوات واني فزعت معكم يالجورجيين الا اني إني أحبكم، ونبي نكز برطمنا لكم "أم رايس" وتبي تشوف شغلها عندكم.
وقال بعد اني مريت العثيم وبنده والسدحان وتقضيت لكم اغراض وعيشه وحطيتهن بشنطة الطياره سي - 17 لكم يالجورجيين، وهالكم يوم نبي نرسل كم من طياره عسكريه مع زكرت البحرية عشان يعاونونا بتنقيل هالعيشه لكم خبركم الشغل حامي عندكم.
وقال مراسلنا هناك ان الروس للحين يهايطون بشوارع (جوري) بجورجيا ويدورون بدباباتهم بالديره، وقال سمعت هرج ناس هناك يقولون ان موكب دبابات روسيه داعسين للعاصمه تبليسي والله يستر ماندري وش ناوين(ن )عليه.
الرئيس الجورجي طق صدره وقال "أمعصي نتركهم كذا.. محناب تاركينهم يعيثون بالديره فساد.. لا والله لو ياصل الدم للركب.. مادون الحلق الا اليدين،، والله مانستسلم للروس لو ايش وما كان.. والوعد قدام يابوتين انت وصلعتك ..