والله مالي داعي اثري يوم ابلشكم بجيتي


هذا سلمكم الله أحمدي نجاد ماغيره رئيس ايران يوم يسيّر على تركيا (لا تقولون لي هو بعد خاق مع مسلسل مهند.. ترا يسويها هالمهوي) سبب مشاكل بسبة روحته لتركيا علشان يسيّر على رئيسهم عبد الله أوجلان،، وقال أوجلان ان تقاريرن وصلتنا من الشرطة ان ابو نجاد عليه العين وناوين ينتفونه وهو موجود عندنا.
ويوم سأله واحدن من المراسلين حقيننا عن هالحوسه والحراسات والتفاتيش والقلق اللي مسوينه وش علشانه؟ قال الرئيس التركي اننا ماسوينا هالحوسه ايام الخميس والجمعه الا عقب ماجانا ناسن طايلتن السنتهم يهددون الرئيس الايراني انهم يبون ينتفون ريشه، ولا زاد ولا كلمه من هالهرج.
وقال جول ترا انا مثلكم شفت هالحوسه والزحمات وتقطيع الاشارات جاني احباط مثلكم، لكن يوم زهمت على حدا الزكرت بالشرطه قالوا لي ان هالحوسه لازم نسويها خبرك العالم حاطين عيونهم علينا عقب مهند والشله وودنا نصير مرتبين ومنظمين.
وهالشرطه بهذلوا العالم هالمساكين صككوا كل الشوارع اللي يبي يمر بها أبو نجاد على دربه وهو يتمشى بالديره، وسبب مشاكل لناس كثيرين منهم اللي ضاعت رحلات طيرانهم واللي راح موعد اسنانه واللي احترق عليه الكلتش.. الخ،، لكن ابو نجاد صار نشمي واعتذر للشعب عن القلق اللي سواه وقال ان الدوريات التركيه الله يعافيهم ماقصروا والظاهر انهم ماسووا كذا الا انهم خايفين من محارش هالصهيون لا بارك الله بهم.