مسجد الراجحي فرع اوروبا


وافقت امارة ولاية كولونيا الألمانيه على انهم يبنون مسجد كبير بالحيل يمكن يبي يصير اكبر مسجد بأوروبا بكبرها عقب ما صادقت الهيئة الاسلاميه بألمانيا هالقرار عقب ما اتفقوا جميع انهم يقصرون المآذن شوي عن اللي مسوينه بالتصميم، حسب كلام مراسلنا، وهالخبر جاء على القناة الاولى حقت ألمانيا عن واحدن واصل بمجلسهم ان اغلب اللي يتكون معنا بالمجلس البلدي موافقين على فكرة بناء هالمسجد بحي يقال له ارينفيلد، ووافق على هالشغل والتصاميم كذا حزب واللي ماوافق عليه هو الحزب المسيحي الديموقراطي عساهم للضربه. وقال واحدن من هالحزب ان هالمنارات طويلات بالحيل قصروهن شوي (55 متر) لأن هالمنارة تبي تلفت انظار العالم اللي يجون لهالديره وتبي تغطي على معالم الديره ومبانيها. وعقب ما اتفقوا على هالتصميم الزين قالوا نبي نردم المسجد القديم ونبي نحطه بمكانه خلال هالشهر ان قاله الله ويبي يصير فيه مغاسل وش زينهن بس خلونا ننتهي منهن. ويقولون ان مهندس ألماني كبير يبي يشيّك على بناء هالمسجد ويبي يشيّك على معلمين القرميد هم يجون بدري ولالا، ويقولون ان هالمهندس متخصص بالمباني الدينيه ويقال له باول بويم. وهالمسجد ان شاء الله يبي ييزي فوق 1200 مصلي ويبي يصير فيه مركز ثقافي، ويبون يبنونه حول ثلاث سنين ، ويقول مراسلنا انه المفروض انه ييزي 2000 مصلي لكن الجود من الماجود. يوم سألت خوينا عن المساجد هناك قال ان الديره فيها خير .. فيها حول 159 مسجد بألمانيا بلحالها، مع العلم انه بعام 1990 كان مافيها الا ثلاثة مساجد بس! وعدد المسلمين بذاك حول 3 ملايين ونص مسلم الله يزيدهم كمان وكمان، ويبارك باللي فكر وخطط ودرس وبنى هالمسجد ..