إعصار قوستاف الأمريكي تعادل قوته التدميريه اعصار كاترينا ذيك الايام ياحافظ


يالله تحفظنا بحفظك،، ملاحظين الاعاصير كاثره هالايام على امريكا هذا وحنا تونا بالصيف ماجاء وقت الامطار والعواصف، هذا اعصار جديد يقال له قوستاف جاي مجلعد من اتحت امريكا عند لويزيانا (انظر الخريطه للاستزاده)، قاموا حقين الارصاد يزبدون ويرعدون يحذرون العالم من هالاعصار وانه يبي يحوسهم حوس وبالضبط يبي يحوس لويزيانا وشمال شرق تكساس كم من يوم وبعد اذن الله يبي يجيهم امطار وفياضانات تخوّف. وقال مراسلنا "مقلع كراني" انه بدايات الاعصار تخوف هالحين بوسط الجزر والشواطئ سرعة الهواء صافقه طبلونها 160 كيلومتر بالساعه، والبلا انه كل مادخل بالديره كل مازادت سرعته ووصلت الحين لـ 185 كيلومتر بالساعة. ويقول مراسلنا اللي لابس كيس علشان يحتمي من المطر ان هالولاية جالسين يسوون اكبر عملية نحشه بتاريخها، وحسب كلام الفاهمين يقولون 95% من اللي ساكنينها (حول مليونين ادمي) ضفوا اللي يقوون عليه ودعسوا بسياراتهم للملاجئ وبرا الديره علشان هالاعصار اللي يتوقعون انه يبي يحوسهم اليوم الاثنين. وهالاعصار يعتبر من أعاصير الفئة الثالثه واللي سرعته غالباً ماتكون حول 175 كيلومتر بالساعه،، وهو نفس مقياس قوة اعصار كاترينا اللي حاس مرير أمريكا عام 2005 ومات فيه حول 1800 واحد يعني بالعربي دمرها الا شوي حتى انهم جلسوا يشحذون خلق الله بالمساجد بسبته (بالمساجد اجل خخخ).
الله يدفع البلا ويحفظ اخواننا المسلمين هناك كان الله اراد وصار هالاعصار..